Sajak sunda, karya Sayudi

Beca

Jalan netek
beca lengkahna ngeteyep
dina sela-sela napas kuda
dina sela-sela warna kota
beuratna muatan beuratna tanggungan
di tukang momot kamelang
di hareup muat kahayang 
na beuteung bawana lapar

kota S, 29 Januari 1960

Indung jeung Anak

Anak :
     Ema naon eusi langit
     Jeung dimana tungtung langit
     Katut bentang nu baranang

Indung :
     Teu jauh didada ema
     eusina napas jeung geutih
     bentang teu jauh ti Ujang

Anak :
     Ema saha nu boga langit
     jeung bentang anu baranang
     saha nu boga bulan
     katut beurang jeung peutingna
     
Indung :
     Kapan sagala nu Ujang
     Paeh hirup nu Ujang

kota S, Juni 1956